नेकपा उपाध्यक्ष बामदेव गौतमविरुद्ध सर्वोच्च अदालतमा परेको मुद्दामा पेसी स्थगित भएको छ । प्रधानन्यायाधीश चोलेन्द्र शम्शेर ज.ब.रा.सहितको संवैधानिक इजलासमा गौतमको मुद्दा हेर्दाहेर्दैमा छ । संवैधानिक इजलासका मुद्दा बुधबार र शुक्रबार मात्र हेर्ने प्रावधान छ । तर, प्रधानन्यायाधीश ज.ब.रा.ले आज बुधबार यो मुद्दालाई पेसी सूचीमा राखेका छैनन् । आज कात्तिक १९ गते प्रधानन्यायाधीश ज.ब.रा.ले दीपककुमार कार्की र मनोजकुमार शर्मा, हरिकृष्ण कार्की र कुमार रेग्मी, विश्वम्भरप्रसाद श्रेष्ठ र प्रकाशमानसिंह राउत, इश्वरप्रसाद खतिवडा र प्रकाशकुमार ढुङ्गाना, डा. आनन्दमोहन भट्टराई र बमकुमार श्रेष्ठको संयुक्त र पुरुषोत्तम भण्डारीको एकल इजलास तोकेका छन् ।
मन्त्रिपरिषदको सिफारिसमा नेकपा उपाध्यक्ष बामदेव गौतमलाई राष्ट्रपति विद्यादेवी भण्डारीले राष्ट्रियसभामा मनोनित गरेपछि वरिष्ठ अधिवक्ता दिनेश त्रिपाठीले बामदेव प्रत्यक्ष निर्वाचनमा पराजित भएकाले सांसद बन्न नपाउने भन्दै असोज ६ गते सर्वोच्च अदालतमा रिट हालेका थिए । सर्वोच्चका न्यायाधीश डा. आनन्दमोहन भट्टराईद्धारा गम्भीर संवैधानिक बहस जरुरी भएकोले गौतमलाई थप जिम्मेवारी नदिनु भन्दै असोज ७ गते अन्तरिम आदेश दिइएको थियो । साथै भट्टराईले दुवै पक्षलाई १४ गते उपस्थित हुन आदेश दिएका थिए । भट्टराईको आदेश अनुसार १४ गते प्रधान न्यायाधीश चोलेन्द्र शम्शेर ज.ब.रा. ले आफ्नै नेतृत्वमा न्यायाधीशहरु दीपककुमार कार्की, हरिकृष्ण कार्की, विश्म्भरप्रसाद श्रेष्ठ र ईश्वर खतिवडा रहेको संवैधानिक इजलास गठन गरेका थिए ।
