काठमाडौँ, चैत २१ गते । राजस्व अनुसन्धान विभागले दुई साताअघि प्रहरीबाट बरामद भएको सुन तस्करी गर्न लगिँदै गरेको २५ करोड रुपियाँको मुख्य मालिक पहिचान गर्न सफल भएको छ । विभागका अनुसन्धान अधिकृतको दुई सातासम्मको अथक् मिहिनेत, परिश्रम र सूक्ष्म अनुसन्धानले सो रकमको मालिक सिन्धुपाल्चोक जिल्ला भोटेकोसी गाउँपालिका–४ स्थायी घर भई हाल काठमाडौं जिल्ला टोखा नगरपालिका–१० महादेवटार बस्दै आइरहेका नारायण पौडेल रहेको तथ्य औंल्याएको हो ।
विभागका महानिर्देशक चण्डीप्रसाद घिमिरेले अहिलेसम्मको अनुसन्धानले बरामद भएको २५ करोड रुपियाँको मुख्य मालिक नारायण पौडेलले नै रहेको पुष्टि भएको बताउनुभयो । पौडेलको खोजतलास जारी राखिएको जनाउँदै विभागले अदालतबाट पक्राउ पुर्जी जारी भइसकेको जनाएको छ ।
रकम बरामद भएको दिनदेखि नै फरार पौडेललाई पक्राउ गरी विभागमा दाखिला गर्न विभागले प्रहरीलाई पत्राचार गरेको छ । यसअघि पनि भारतमा बसेर विभिन्न तस्करीका कार्य गर्ने गरेकाले पौडेल हाल भारतमा लुकेर बसेको हुन सक्ने स्रोतको दाबी छ ।
महानिर्देशक घिमिरेले विभागले स्वतन्त्रपूर्वक अनुसन्धान गर्न पाएको र प्रधानमन्त्री तथा उहाँको सचिवालयबाट आवश्यक सहयोग पाएकाले २५ करोड तस्करीको मुख्य मालिकको पहिचान गर्न विभाग सफल भएको बताउनुभयो । यद्यपि पौडेलभन्दा माथि पनि तस्करीको ठूलै समूह रहेको हुन सक्ने आशंका बाँकी नै छ र पौडेलका व्यावसायिक साझेदारका बारेमा पनि विभागले केही जानकारी दिएको छैन । पौडेल पक्राउ परेपछि त्यसबारेमा पनि अनुसन्धान हुन सक्ने विभागका अधिकारीहरुले जनाएका छन् ।
यसअघि रक्तचन्दन तथा विभिन्न सुन तस्करी प्रकरण, जुवा प्रकरण र हुण्डी कारोबारमा समेत जोडिँदै आएका पौडेल माओवादी केन्द्र निकट मानिन्छन् । उनलाई माओवादी केन्द्रका केही शीर्ष नेताहरुको संरक्षण रहेको स्रोतको दाबी छ । विभागले पौडेल ठूलो कारोबार गर्ने तस्कर रहेको औंल्याउँदै उनको सम्पूर्ण सम्पत्ति र बैंक खाता रोक्का गर्न सम्बन्धित निकायमा पत्राचार गरेको छ । विभागले पौडेल तथा पक्राउ परेका ‘फुच्चे’ भनिने कुसाङ लामालाई विदेशी विनियमको अवैध ओसारपसार तथा अपचलनमा मुद्दा दायर गर्ने तयारी गरेको छ ।
काठमाडौं उपत्यका अपराध अनुसन्धान कार्यालय टेकुबाट खटिएको प्रहरी टोलीले गत चैत्र ४ गते काठमाडौंको उत्तरी भेगमा पर्ने टोखा नगरपालिका–२ झोरमा २५ करोड १९ लाख २४ हजार ९ सय ५० रुपियाँ बराबरको डलर र युरो बरामद गरेको थियो । प्रहरीले ना७ख १६५२ नम्बरको ट्रकमा राखेर लैजान लागिएको सो रकम बरामद गर्नुका साथै रकम लिएर जान लागेका ट्रक चालक सिन्धुपाल्चोक भोटेकोसी गाउँपालिका–१ घर भएका ४३ वर्षीय लामालाई पक्राउ गरेको थियो । त्यसपछि प्रहरीले बरामद भएको रकम, ट्रक र चालकलाई गत चैत ५ गते नै थप अनुसन्धानका लागि राजस्व अनुसन्धान विभागको जिम्मा लगाएको थियो । त्यसपछि विभागका महानिर्देशक घिमिरेले तत्काल विभिन्न अनुसन्धान टोलीहरु बनाएर घटनाको विस्तृत अनुसन्धान थाल्नुभएको थियो ।
कसरी पहिचान भए पौडेल रु
राजस्व अनुसन्धान विभागका सूचना अधिकारी नवराज अधिकारीका अनुसार महानिर्देशकले चैत ५ गतेदेखि नै विभिन्न अनुसन्धान टोली बनाएर अनुसन्धान थालेसँगै विभागका अनुसन्धान अधिकृतहरुले पक्राउ परेका लामाको कल डिटेल्स रेकर्ड, डिजिटल डिभाइसको विश्लेषण गर्दै अनुसन्धान थालेका थिए । लामा र मुख्य मालिक पौडेलबीच वारदात हुनु ठीक अघि धेरैपटक कुराकानी भएको अनुसन्धान अधिकृतहरुले पत्ता लगाएका थिए ।
पौडेलले प्रयोग गर्ने मोबाइल नम्बरको सीडीआर विश्लेषण गर्नुका साथै सिसिटिभी फुटेज र डिजिटल डिभाइसको विश्लेषण, पौडेलको घर, कारोबार स्थल, गोदामहरु खानतलासी गर्दै विभिन्न प्रमाणहरु जुटाइएको जानकारी दिँदै विभागका एक अनुसन्धान अधिकृतले भने– ‘विभिन्न तथ्यहरुले २५ करोडको मुख्य मालिक नारायण पौडेल नै रहेको पाइयो, उनको अस्वाभाविक कारोबार र सम्पत्तिसमेत रहेको देखिएको छ ।’
काठमाडौस्थित टोखाको घरमा एक जना काम गर्ने मान्छे राखेर पौडेल आफूसहित सम्पूर्ण परिवार नै फरार बनेका छन् । स्थानीयका अनुसार पौडेलको श्रीमतीको केही समय अघि मृत्यु भइसकेको छ । एक छोरा र एक छोरी रहेकामा दुवै जना विदेश गएको बताइएको छ । विभागले घरमा कोही पनि फेला नपारेपछि टोखा–१० का वडा प्रतिनिधिको रोहवरमा खानतलासी गरिएको थियो ।
अनुसन्धानको क्रममा सो ट्रकमा २५ करोड राख्नुअघि ट्रकलाई पालैपालो कहिले कलंकी, कहिले ठिमी त कहिले एयरपोर्ट नजिकैको खहरे भन्ने ठाउँमा लगेर राखिएको र पैसा राख्ने फल्स बटम बनाइएको पाइएको थियो । विभागका अधिकारीहरुले सिसिटिभीमार्फत सो पैसा लोड गरेको ठाउँ र अवस्थाबारे पनि पत्ता लगाएका छन् । यसअघि पनि पौडेल विभिन्न आपराधिक प्रकरणमा मुछिएका थिए । २०५९ मा हङकङमा करोडौं डलर तस्करी गरेको आरोपमा उनी राजस्व अनुसन्धान विभागबाट पक्राउ परेका थिए ।
ऊन आयातको नाममा नेपाल इन्भेष्टमेन्ट बैंकबाट एलसी खोल्ने, तर ऊन आयात नगरी डलर तस्करी गर्ने उनको धन्दा त्यतिबेलै सार्वजनिक भएको थियो । सोलु र पर्साका विभिन्न व्यक्तिको नाममा कम्पनी खोलेर उनले यो गैरकानुनी कारोबार सञ्चालन गरेका थिए । पक्राउपछि जेल बसेका पौडेलले विभिन्न पहुँच प्रयोग गरी छुटेको भोटेकोशी गाउँपालिकाका स्थानीयले बताएका छन् ।
उनको तस्करीको सञ्जालमा अन्य व्यापारीको ठूलो समूह पनि संलग्न रहेको स्रोतको दाबी छ । त्यति मात्रै होइन २०८० को असार २ गते महाराजगञ्जस्थित एक घरमा जुवा अखडा चलाएको आरोपमा उनलाई प्रहरीले पक्राउ गरेको थियो ।
प्रहरी स्रोतका अनुसार प्रहरी वृत्त महाराजगञ्जले उनलाई १ लाख ९० हजार नगदसहित पक्राउ गरेको थियो । तर, त्यति बेला उनका भाइ राजकुमार पौडेल र अन्य माओवादी नेताहरूको दबाबमा उनी छुटेका थिए ।
यस्ता छन् पौडेलका कर्तुत, एकपछि अर्को अपराधमा माओवादी संरक्षण १
सिन्धुपाल्चोकको भोटेकोसी गाउँपालिका–४ स्थायी घर भई टोखा नगरपालिका–१० बस्ने नारायण पौडेल वर्षांैदेखि जिल्लामा विवादास्पद व्यापारीका रुपमा रहेका छन् । यसअघि पनि पौडेल पटकपटक विभिन्न तस्करीमा पक्राउ परे पनि माओवादी केन्द्रका नेताहरुको संरक्षणमा छुट्दै आएका थिए । परिवारका साइँलो नारायण पौडेल माओवादीमा आबद्ध छन् ।
पौडेल यसअघि पनि पटकपटक रक्तचन्दन तस्करीलगायतका कारोबारमा विवादमा परेका थिए । हुण्डी कारोबारीसमेत रहेको बताइएको पौडेलको परिवार नै तस्करीमा संलग्न रहेको प्रहरीको विभिन्न अनुसन्धानबाट खुल्न आएको हो । यसअघि ३३ किलो सुन प्रकरणमा उनका दाजु बच्चु पौडेल र भाइ राजकुमार पौडेल पनि संलग्न रहेको पाइएको छ । पौडेलविरुद्ध २०७४ सालमा सीआईबीले सुन तस्करीमा मुद्दा दर्ता गरेको थियो ।
मुद्दा दर्तापश्चात उनी फरार भएका थिए । तत्कालीन गृहमन्त्री जनार्दन शर्माले जोगाएको आरोप लागेका उनको साथबाट बरामदमध्ये १४ किलो सुन टोखाबाटै भेटिएको थियो । माओवादी केन्द्रबाट २०७४ सालमा भाइ राजकुमार भोटेकोसी गाउँपालिका अध्यक्षमा निर्वाचित भएका थिए भने २०७९ सालमा भने कांग्रेससँग पराजित भएका थिए । काङ्ग्रेसमा आबद्ध पौडेलका अर्का भाइ बच्चु हिमालय सीमापार व्यापार संघको पूर्वअध्यक्ष पनि हुन् । पौडेल आफैं लामो समयदेखि माओवादीमा आबद्ध छन् । (आजको नेपाल समाचारपत्र दैनिकबाट)
