धादिङ, मङ्सिर २३ गते । चितवनबाट काठमाडौँतर्फ आउँदै गरेको भारतीय नम्बरको ग्यास बुलेट दुर्घटना भएको छ । एनएल ०२ एल ३९०७ नम्बरको भारतीय ग्यास बुलेट पृथ्वी राजमार्गअन्तर्गत धादिङको बेनिघाट रोराङ गाउँपालिका –७ कृष्णभीरमा आज बिहान दुर्घटनामा परेको हो ।
ग्यास बोकेको बुलेट त्रिशूली नदीमा खस्दा चालक बेपत्ता भएका छन्। जिल्ला प्रहरी कार्यालय धादिङका अनुसार सो बुलेटको इन्जिन सडकबाट करिब एकसय पचास मिटर तल भिरमा अड्किएको र बुलेट त्रिशुली नदीले बगाएर करिब दुईसय मिटर तल पु¥याएको अवस्थामा छ ।
दुर्घटनामा परेको ग्यास बुलेटको उद्धारको काम भइरहेको र चालक सहचालक समेत नभेटिएकाले दुर्घटनास्थलमा खोजी कार्य रहेको प्रहरीले जनाएको छ । जिल्ला ट्राफिक प्रहरी कार्यालय गजुरीका अनुसार अहिले उद्धार जारी छ । यद्यपि घाइते कोही पनि भेटिएको छैन । अहिले चालक र सहचालकको खोजी भइरहेको छ । सडकबाट तल खसेको गाडीको केही भाग भीरमा अड्किएको छ ।
सो क्षेत्र नजिकैका वासिन्दालाई आवश्यक सतर्कता अपनाउन अनुरोध गरिएको छ । ग्यास चुहावट भएको देखिएमा तुरुन्त प्रहरीको १०० नम्बरमा जानकारी गराइदिन पनि अनुरोध गरिएको जिल्ला ट्राफिक प्रहरी कार्यालय गजुरीका प्रहरी निरीक्षक सुरज श्रेष्ठले जानकारी दिनुभयो । घटनाबारे थप विवरण आउन बाँकी छ ।
