मकवानपुर, मङ्सिर ७ गते । मकवानपुरको हेटौँडा उपमहानगरपालिका–१५ स्थित चुरियामाई मन्दिरनजिकै रातोपाटे भन्ने स्थानमा यात्रुबाहक बस दुर्घटना हुँदा १७ जना घाइते भएका छन् । वीरगन्जबाट पोखरा जाँदै गरेको ग २ ख १६२१ नम्बरको यात्रुबाहक बस ब्रेक फेल भई दुर्घटना हुँदा १७ जना घाइते भएका हुन् ।
दुर्घटनामा घाइतेमध्ये १ जनाको अवस्था गम्भीर रहेको प्रहरीले जनाएको छ । दुर्घटनामा घाइतेमध्ये बाराको पर्सैनी गाउँपालिकाकी ९ वर्षीया जोनीशा कुमारी ठाकुरको टाउकोमा गम्भीर चोट लागेकाले अवस्था गम्भीर रहेको र अन्य १६ जना घाइतेमध्ये १४ जनाको अवस्था मध्यम र २ जनाको अवस्था सामान्य रहेको प्रहरीले जनाएको छ ।
जिल्ला प्रहरी कार्यालय मकवानपुरका अनुसार सबै घाइतेको उपचार हेटौँडा अस्पतालमा भइरहेको छ ।
