वासिङ्टन, कात्तिक २१ गते । राष्ट्रपतिका उम्मेदवार डोनाल्ड ट्रम्पले फ्लोरिडाको पामबिचमा भेला भएका समर्थकलाई सम्बोधन गरेका छन् । परिवारका सदस्य ( श्रीमती मेलानिया ट्रम्प, चुनावी अभियानका कर्मचारी र र उपराष्ट्रपतिका उम्मेदवार जेडी भान्ससहित) स्टेजमा पुगेका ट्रम्पले आफूलाई चुनेकोमा मतदातालाई धन्यवाद दिएका हुन् ।
समर्थकलाई सम्बोधन गर्दै राष्ट्रपतिका उम्मेदवार ट्रम्पले भने, ‘हामी हाम्रो देशलाई पुनः प्राप्ति गर्न मद्दत गर्नेछौँ। यो अमेरिकाको लागि “स्वर्ण युग“ हुनेछ, यो अमेरिकी जनताका लागि ठुलो जीत हो । जसले हामीलाई अमेरिकालाई फेरि महान् बनाउन सक्षम बनाउँछ ।’
ट्रम्पले सम्बोधनलाई आफ्नो जितको पनि घोषणा गरेका छन् । यद्यपि यसको औपचारिक घोषणा भने भइसकेको छैन । ट्रम्पले ‘अमेरिकाले हामीलाई अभूतपूर्व र शक्तिशाली बहुमत दिएको छ’ भनेका छन् ।
उनको जितको औपचारिक घोषणा भइसकेको छैन । तर सम्बोधनलाई विजय भाषणका रुपमा उपयोग गरेका ट्रम्पले भने, ‘तपाईंहरुको ४७ औँ र ४५ औँ राष्ट्रपति चुनिने असाधारण मौका दिनुभएकोमा म अमेरिकी जनतालाई धन्यवाद दिन्छु, हामी हाम्रो देशलाई निको पार्न सघाउने छौँ ।’
