फाइल तस्वीर
मस्को, साउन २० गते । रूसी राष्ट्रपति भ्लादिमिर पुटिनले आइतबार अन्तर्राष्ट्रिय यातायात कोरिडोरको विकास गर्ने योजना सार्वजनिक गर्नुभएको छ ।
“हामी बाल्टिक र बेरेन्ट्स समुद्रबाट फारसको खाडी र हिन्द महासागरको किनारसम्म ‘सिमलेस रेल’ सञ्चार स्थापना गर्ने लक्ष्य राखेका छौँं,” रूसी राष्ट्रपति पुटिनले अगस्ट ४ अर्थात् रूसको रेलवे श्रमिक दिवसको अवसरमा एक भिडियो सम्बोधनमा भन्नुभयो ।
नेता पुटिनले भन्नुभयो, “यी वास्तवमै महान् कार्य हुन् र मलाई विश्वास छ कि तपाईहरूको विशेषज्ञता, अनुभव र राष्ट्रको हितप्रतिको प्रतिबद्धताले हामी ती हासिल गर्नेछौँ ।”
सो अवसरमा उहाँले मस्कोमा प्रमुख केन्द्रीय यातायात मार्गसँग एकीकृत हुने उच्च गतिको रेलवे, अन्तर्राष्ट्रिय रसद कोरिडोर र अजोभबाट ब्ल्याक सीतर्फको यातायात मार्गको वृद्धिसहित प्रमुख परियोजनाहरूको रूपरेखा पनि प्रस्तुत गर्नुभएको थियो ।
पुटिनले भन्नुभयो, “हामीले नवीनतम् आविष्कारहरूको प्रयोग गरेर उन्नत प्राविधिक उन्नयनको साथ रूसको रेलवे पूर्वाधारको विस्तारलाई गति दिन आवश्यक छ । “हाम्रो दृष्टिकोण वर्तमान आवश्यकताहरू मात्र पूरा गर्नमा केन्द्रित छैन । हामी भविष्यका मागहरूको लागि पनि तयार हुनुपर्छ जसले आगामी दशकहरूको लागि प्रगति सुनिश्चित गर्दछ ।
उहाँले रूसको पूर्वी रेलवे प्रणाली, विशेष गरी बाइकल–अमुर, ट्रान्स–साइबेरियन रेलवे, र आर्कटिक बन्दरगाहहरूसँग जोड्ने यामालो–नेनेट्स स्वायत्त जिल्लामा ७०० किलोमिटर लामो उत्तरी अक्षांश क्षेत्रको रेलवेको थप आधुनिकीकरणको महत्वमा जोड दिनुभयो ।
