फाइल तस्वीर
भद्रपुर, साउन २ गते । आन्तरिक राजस्व कार्यालय भद्रपुरले आर्थिक वर्ष २०८०/८१ मा तीन अर्ब २१ करोड १२ लाख ६७ हजार रुपैयाँ राजस्व सङ्कलन गरेको छ । कार्यालयले गत असारमा मात्र ३० करोड ७१ लाख नौ हजार रुपैयाँ राजस्व सङ्कलन गरेको हो ।
कार्यालयले आ व २०७९/८० को तुलनामा १९ करोड ५२ लाख ९१ हजार रुपैयाँभन्दा बढी राजस्व सङ्कलन गरेको छ । गत आ वमा तीन अर्ब एक करोड ५९ लाख ७६ हजार रुपैयाँ राजस्व सङ्कलन भएको आन्तरिक राजस्व कार्यालय भद्रपुरका सूचना अधिकारी भीमप्रसाद आचार्यले जानकारी दिनुभयो । गत आवमा कार्यालयको तीन अर्ब ७९ करोड ७१ लाख रुपैयाँ राजस्व उठाउने लक्ष्य थियो । तर ८४ दशमलव ५७ प्रतिशतमात्र राजस्व सङ्कलन गर्न सकिएको छ । सूचना अधिकारी आचार्यले “देशभर व्यापार–व्यवसायमा गिरावट आउँदा राजस्व सङ्कलनमा कमी आएको हो”, उहाँले भन्नुभयो ।
आन्तरिक राजस्व कार्यालयले आयकरबाट एक अर्ब ६९ करोड ९४ लाख रुपैयाँ, भाडा आयकरबाट तीन करोड ६४ लाख रुपैयाँ, ब्याजबापत ११ करोड ५९ लाख रुपैयाँ, मूल्य अभिवृद्धि करबापत एक अर्ब २९ करोड पाँच लाख रुपैयाँ तथा अन्तःशुल्क बापत ६४ करोड ४६ लाख ५५ हजार रुपैयाँ राजस्व सङ्कलन गरेको सूचना अधिकारी आचार्यले बताउनुभयो । जिल्लामा विकास निर्माणका आयोजनामा चालु आवमा कम भुक्तानी हुँदा मूल्य अभिवृद्धिकरबापत हुने आम्दानी घटेको छ । गत आवमा मूल्य अभिवृद्धिकरबापत एक अर्ब ३७ करोड ८८ लाख ९२ हजार रुपैयाँ राजस्व सङ्कलन भएको थियो ।
