फाइल तस्वीर
काठमाडौँ — चालु आर्थिक वर्ष २०८०/८१ को सुरुआती दुई महिनामा सरकारी बजेट खर्च वार्षिक लक्ष्यको सात दशमलव ४९ प्रतिशत बराबर देखिएको छ । महालेखा नियन्त्रक कार्यालयको तथ्याङ्कअनुसार भदौ मसान्तसम्ममा सरकारले एक खर्ब ३१ अर्ब १४ करोड १३ लाख रुपैयाँ बराबर बजेट खर्च गरेको छ ।
सरकारले चालु आवका लागि कूल १७ खर्ब ५१ अर्ब ३१ करोड २१ लाख रुपैयाँ बराबरको बजेट ल्याएको थियो । सोमध्ये चालु शीर्षकमा ११ खर्ब ४१ अर्ब ७८ करोड रुपैयाँ विनियोजन भएकोमा हालसम्म सात दशमलव ६८ प्रतिशत अर्थात् ८७ अर्ब ६६ करोड ३५ लाख रुपैयाँ बराबर रहेको छ । पूँजीगत शीर्षकमा दुई दशमलव सात प्रतिशत मात्रै बजेट खर्च भएको छ । यो शीर्षकमा तीन खर्ब दुई अर्ब सात करोड रुपैयाँ बराबरको बजेट छुट्याइएकोमा भदौ मसान्तसम्ममा आठ अर्ब १६ करोड ३९ लाख रुपैयाँ बराबर बजेट खर्च भएको छ ।
वित्तीय व्यवस्थापन शीर्षकको बजेट खर्च वार्षिक लक्ष्यको ११ दशमलव ४९ प्रतिशत बराबर छ । मुख्यगरी सरकारी ऋण तिर्नका लागि प्रयोग हुने वित्तीय व्यवस्थापनतर्फको बजेट चालु आवका लागि तीन खर्ब सात अर्ब ४५ करोड रुपैयाँ बराबर छ । पछिल्लो दुई महिना अवधिमा वित्तीय व्यवस्थापन शीर्षकबाट ३५ अर्ब ५१ करोड ३९ लाख रुपैयाँ खर्च भएको छ ।
यहि अवधिको सरकारी राजस्व सङ्कलन वार्षिक लक्ष्यको १० दशमलव ४७ प्रतिशत बराबर छ । चालु आवका लागि सरकारले कूल १४ खर्ब ७२ अर्ब ४८ लाख रुपैयाँ बराबर बजेट छुट्याउने लक्ष्य राखेकोमा भदौ मसान्तसम्ममा एक खर्ब ५४ अर्ब २३ करोड ५९ लाख रुपैयाँ बराबर राजस्व उठेको छ ।
कर राजस्व वार्षिक लक्ष्यको नौ दशमलव आठ प्रतिशत अर्थात एक खर्ब २७ अर्ब ९५ करोड ६७ लाख रुपैयाँ र गैरकर राजस्व लक्ष्यको ११ दशमलव २१ प्रतिशत अर्थात् १३ अर्ब १२ करोड रुपैयाँ बराबर उठेको छ । यो अवधिमा सरकारले वैदेशिक अनुदान भने लिएको देखिँदैन ।
