मस्को — रूसी प्रशासनिक केन्द्र, क्रेमलिनले वाग्नर प्रमुख येभेगिनी प्रोगोजिन चढेको विमान दुर्घटनाको अनुसन्धान सुस्त गतिमा भएको भनी आएका आरोपहरूको खण्डन गर्दै अनुसन्धान निरन्तर गतिमा चलिरहेको जनाएको छ । रूसी निजी लडाकू समूह वाग्नर प्रमुख प्रोगोजिनको विमान दुर्घटनामा निधन भएकोबारे छानविन सुरू भएको भनिएको तीन हप्तासम्म पनि कुनै अपडेट नगराइएको भन्दै पश्चिमी सञ्चारमाध्यमहरूमा आलोचना व्याप्त बनेपछि क्रेमलिनले यसको खण्डन गरेको हो ।
पश्चिमी राष्ट्रहरूले अगस्ट २३ मा मस्को र सेन्टपिटर्सवर्गबीचको आकाशमा भएको दुर्घटनामा रूसको भूमिकामाथि आशङ्का व्यक्त गर्दै सत्यतथ्य बाहिर ल्याउन अनुसन्धान गर्न आवाज उठाएका थिए । विमान दुर्घटना प्रोगोजिनले रूसविरूद्ध विद्रोह गर्ने घोषणा गरेको दुई महिनामा भएको थियो । यसै हप्ता अर्को विमानलाई साइबेरियामा आपतकालीन अवतरण गराइएको घटनाबारे रूसी अधिकारीले अवतरण गर्नपर्नुका सम्भावित कारणबारे अनुसन्धानपछि तत्काल प्रतिवेदन सार्वजनिक गरेको छ ।
प्रोगोजिन चढेको विमान दुर्घटनाको अनुसन्धान ढिलो भएको हो भनी सोधिएको प्रश्नमा क्रेमलिनका प्रवक्ता दिमित्री पेश्कोभले भन्नुभयो, “ होइन, मैले विल्कुल त्यस्तो सोच्न सक्दिन । यो सामान्य अनुसन्धान होइन । अहिले नै यस बिषयमा हल्का टिप्पणि गर्नु अपरिपक्वता हुनेछ ।”विमान दुर्घटनापछि दिएको प्रतिक्रियामा रूसी राष्ट्रपति पुटिनले प्रोगोजिनले रूसी सत्ताविरूद्ध विद्रोह गर्ने घोषणा गर्नु उहाँको जीवनको गम्भीर त्रुटी थियो तर यसपहिले उहाँले रूसको पक्षमा सही कामका लागि सङ्घर्ष गर्नुभएको छ । पुटिनको कार्यकालमा रूसमा क्रेमलिनका विपक्षीहरूको रहस्यमयी मृत्यु भएको इतिहास छ ।
