फाइल तस्वीर
अर्घाखाँची — अर्घाखाँचीमा सङ्घीय तथा प्रदेश सरकारबाट प्राप्त भएको पुँजीगत र चालुतर्फको बजेटमध्ये ६५ करोड रुपैयाँभन्दा बढी बजेट फ्रिज भएको छ । आर्थिक वर्ष २०७९/८० मा अर्घाखाँचीमा सङ्घीय तथा प्रदेश सरकारको पुँजीगत र चालु तर्फको विनियोजित बजेटमध्ये ६५ करोड ९९ लाख ९३ हजार आठ सय ६१ रुपैयाँ फ्रिज भएको कोष तथा लेखा नियन्त्रण कार्यालयका कोष नियन्त्रक राजु पाण्डेले बताउनुभयो ।
कोष तथा लेखा नियन्त्रण कार्यालयका अनुसार आव २०७९/८० मा प्रदेश सरकारको पुँजीगत तर्फको एक अर्ब ३३ करोड ६५ लाख ८९ हजार रुपैयाँ विनियोजित बजेटमध्ये २० करोड ५६ लाख ६२ हजार ९४ रुपैयाँ बजेट फ्रिज भएको हो । चालु तर्फ ६५ करोड ५३ लाख २१ हजार एक सय ९३ रुपैयाँ विनियोजित बजेटमध्ये १३ करोड दुई लाख ७६ हजार दुई सय २२ रुपैयाँ फ्रिज भएको छ ।
यस्तै सङ्घीय सरकारको चालु तर्फको पाँच अर्ब ३९ करोड २१ लाख ६५ हजार सात सय ४२ रुपैयाँ विनियोजित बजेटमध्ये १८ करोड ५३ लाख ७५ हजार नौ सय ३२ रुपैयाँ बजेट फ्रिज भएको छ । सङ्घीय सरकारको पुँजीगत तर्फ एक अर्ब ५१ करोड ९५ लाख ७२ हजार छ सय रुपैयाँ विनियोजित बजेटमा १३ करोड ८६ लाख ७९ हजार छ सय १६ रुपैयाँ रकम फ्रिज भएको कोष नियन्त्रक पाण्डेको भनाइ छ ।
अर्घाखाँचीमा आव २०७९/८० मा लुम्बिनी प्रदेश सरकारको चालु तथा पुँजीगत एक अर्ब ९९ सय करोड १९ लाख १० हजार एक सय ९३ रुपैयाँ र सङ्घीय सरकारको पुँजीगत तथा चालुतर्फ छ अर्ब ९१ करोड १७ लाख ३८ हजार तीन सय ४२ रुपैयाँ गरी आठ अर्ब ९० करोड ३६ लाख ४८ हजार पाँच सय ३५ रुपैयाँ बजेट विनियोजन भएको थियो ।
