फाइल तस्वीरः आईसीसी एकदिवसीय विश्वकप छनोट ।
काठमाडौं — आईसीसी एकदिवसीय विश्वकप छनोटअन्तर्गत सातौं स्थानका लागि आज भैरहेको प्लेअफ सेमिफाइनलमा युएईले नेपाललाई१८२ रनको विजयलक्ष्य दिएको छ । कुल दश टिम सम्मिलित विश्वकप छनोटमा सुपर सिक्समा पुग्न असफल भएपछि मुख्य स्पर्धाबाट बाहिरिए पनि नेपालले सातौं स्थानको प्लेअफमा सातौं स्थानका लागि अहिले यूएईसँग खेलिरहेको छ ।
टस जितेर फिल्डिङ रोजेको नेपालले चीर प्रतिद्वन्द्वी यूएईलाई सुरुदेखि नै दवावमा राखेको थियो । यूएई ४६ दशमलब ५ ओभरमा १८१ रनमा समेटिएको छ । नेपालले अब जवाफी ब्याटिङ गर्दैछ ।
नियमित कप्तान मोहम्मद वासिम चोटग्रस्त हुँदा ओपनिङ गरेका आसिफ खान खाता नखोली आउट हुँदा अर्का ओपनर अर्यान्स शर्माले तेस्रो नम्बरमा आएका कप्तान भृत्य अरविन्दसँग मिलेर दोस्रो विकेटका लागि ६८ रनको साझेदारी गरेका थिए ।
आर्यन्सलाई सन्दीप लामिछानेले २८ रनको स्कोरमा आरिफ शेखबाट क्याचआउट गराए भने यूएईको इनिङ्समै सर्बाधिक ४४ रन बनाएर अरविन्द गुल्सन झाबाट बोल्ड भए ।
त्यसपछि रमिज शहजाद १० रनमै आउट भए पनि रोहन मुस्तफा र बसिल हमिदले पाँचौं विकेटका लागि अर्को ५८ रनको साझेदारी गरेका थिए । मुस्तफाले ३५ तथा हमिदले २९ रज जोडे भने सन्चित शर्माले १२ रन बनाए ।
बलिङमा करण केसी र सन्दीप लामिछानेले ३–३ विकेट लिन सफल भए । सन्दीपले १० ओभरमा ३ मेडन राख्दै २३ रन खर्चिए भने करणले ८ दशमलव ५ ओभरमा ३६ रन खर्चिए । प्रतीश जिसी, गुल्सन झा र दीपेन्द्रसिंह ऐरीले पनि १–१ विकेट लिन सफल भए ।
आजको खेलमा यसअघि नियमित टिममा रहेका आसिफ शेख, कुशल मल्ल र ललित राजवंशीलाई आराम दिइएको छ । उनीहरुको स्थानमा ज्ञानेन्द्र मल्ल, अर्जुन साउद र प्रतिश जिसीले सुरुवाती टिममा स्थान पाएका छन् ।
