रौतहट — रौतहटमा फरार अभियुक्तलाई पक्राउ गर्न गएका प्रहरीमाथि चक्कु प्रहार भएको छ । गौर नगरपालिका २ लालबकैया खोलापारी केराघारीमा फरार अभियुक्तलाई पक्राउ गर्न गएको प्रहरीमाथी चक्कु प्रहार भएको हो ।
डाँका चोरी र ज्यान मार्ने उद्योगमा फरार रहेका गौर ८ कोइरी टोलका १९ वर्षीय राहुल यादव र अर्का व्यक्तिले चक्कु प्रहार गर्दा जिल्ला प्रहरी कार्यालय रौतहटका सहायक हवल्दार सुरेश यादव घाइते भएको जनाइएको छ ।
सहायक हवल्दार यादवको दाहिने हातमा चोट लागेको छ । प्रहरीमाथि आक्रमण भएपछि प्रहरीले पेस्तोलबाट एक राउण्ड हवाईफायर गरी राहुललाई नियन्त्रणमा लिएको हो ।
घटनास्थलबाट भागेका गौर ४ का १९ वर्षीय रवि यादवलाई बिहीबार बिहान १० बजेतिर पक्राउ गरेको र उनीहरुमाथि थप अनुसन्धान भइरहेको जिल्ला प्रहरी कार्यालय रौतहटले जनाएको छ ।
