दोहा – मलेसियाको क्वालालम्पुरमा ट्रान्जिट हुँदै विभिन्न देश जाने नेपाली नागरिकलाई एउटा मात्र विमानस्थल प्रयोग गर्न मलेसियास्थित नेपाली दूतावासले अनुरोध गरेको छ । मलेसियाको क्वालालम्पुरमा रहेको क्वालालम्पुर अन्तर्राष्ट्रिय विमानस्थल (केलाईए) र क्वालालम्पुर अन्तर्राष्ट्रिय विमानस्थल केलाईए–२ गरी दुईवटा अन्तर्राष्ट्रिय विमानस्थल रहेको दूतावासले जनाएको छ ।
दूतावासका अनुसार हाल क्वालालम्पुरबाट नेपाल र नेपालबाट क्वालालम्पुरका निम्ति सिधा उडानहरु केलाईए बाट मात्रै हुने केलाईए बाट केलाईए–२ मा जान आउन मलेसियन अध्यागमन पार गर्नुपर्ने भएकाले त्यसका निम्ति भिसा आवश्यक पर्दछ । उक्त भिसा हवाइयात्रा गर्नु अगाडि नै लिइसकेको हुनुपर्दछ। तसर्थ, नेपालबाट मलेसियाको क्वालालम्पुरमा ट्रान्जिट हुँदै अष्ट्रेलिया, जापान लगायत अन्य मुलुकहरुमा जाने वा ती मुलुकहरुबाट नेपाल आउँदा सम्भव भएसम्म मलेसियाको क्वालालम्पुरमा रहेको कुनै एक एयरपोर्ट मात्र प्रयोग गर्नेगरी आवश्यक टिकटको व्यवस्था गर्न दूतावासले सबै यात्रुलाई अनुरोध गरेको हो ।
यसअघि पनि नेपालबाट मलेसिया ट्रान्जिट हुँदै अस्ट्रेलिया, जापानलगायत अन्य मुलुकमा जाने नेपाली नागरिकअलपत्र पर्दै आएका थिए । मलेसिया ट्रान्जिट हुँदै अन्य देश जाने नेपालीलाई समस्या नहोस् भनेर एउटा मात्र विमानस्थल प्रयोग गर्न अनुरोध गरिएको दूतावासले जनाएको छ ।
