काठमाडौं – हिन्दुहरुको महान् चाड बडादशैं अगाडिको अन्तिम कारोबार दिन आज शुक्रबार सेयर बजार बढेर बन्द भएको छ । बिहीबार सेयर बजार परिसूचक नेप्से १६ दशमलव २९ अङ्क (० दशमलव ८९ प्रतिशत) ले घटेर १८५३ दशमलव ७६ अङ्कमा बन्द भएको छ । साताको तेस्रो दिन मङ्गलबारदेखि बढ्न सुरु भएको नेप्से लगातार तेस्रो दिन पनि बढेको हो । बिहीबार नेप्सेमा जीवन बीमाबाहेक सबै उपसूचक बढेको छ ।
नेप्से बढेपनि कारोबार रकममा भने खासै उत्साह देखिंदैन । लगानीकर्ता ‘फेस्टिभ मुड’ मा हुँदा पनि कारोबार रकम घटेको बजारका जानकारहरु बताउँछन् । चाडपर्वकै कारण लगानीकर्ता निष्क्रिय बन्दा खरिद र बिक्री अर्डर दुवै घटेको छ । जसले गर्दा कारोबार रकम पनि घटेको हो । बुधबार ४८ करोडमा झरेको कारोबार रकम बिहीबार केही बढेको छ । बिहीबार बजारमा १७ लाख ९१ हजार ४८० कित्ता सेयर कारोबार हुँदा ६३ करोड २७ लाख ७ हजार ६२८ रुपैयाँको कारोबार भएको छ ।
जसमध्ये नेपाल इन्स्योरेन्सको संस्थापक सेयर सर्वाधिक ४ करोड ८५ लाख ५० हजारको कारोबार हुँदा नबिल बैंकको २ करोड ९० लाख ८७ हजार र नेपाल दूरसञ्चार कम्पनीको २ करोड ६२ लाख ९६ हजारको कारोबार भएको छ । बिहीबार बजारमा कुल १८६ कम्पनीको सेयर कारोबार हुँदा १२४ कम्पनीको सेयर मूल्य बढेको छ । त्यस्तै ४७ कम्पनीको सेयरमूल्य गिरावट हुँदा ५ कम्पनीको सेयर मूल्य भने स्थिर छ । जसमध्ये अभियान लघुवित्तको सेयर मूल्य सवार्धिक ९ दशमलव ९८ प्रतिशतले वृद्धि भएर सकारात्मक सर्किट मूल्यमा बन्द भएको छ ।
यस्तै गुराँस लघुवित्तको सेयर मूल्य ५ दशमलव ७६ प्रतिशत र समिट लघुवित्तको सेयर मूल्य ५ दशमलव ४० प्रतिशतले वृद्धि भएको छ । सामलिङ पावर कम्पनीको सेयरमूल्य ७ दशमलव ९४ प्रतिशतले गिरावट हुँदा हिमालयन पावर पार्टनको सेयर मूल्य ३ दशमलव ६९ प्रतिशत र पञ्चकन्या माइ हाइड्रोपावरको ३ दशमलव ४९ प्रतिशतले बढेको छ ।
