वासिङटन – युक्रेनमाथि रुसले आक्रमण गर्न सक्ने भन्दै अमेरिकाले आफ्ना सेनालाई हाई अलर्टमा राखेको अन्तर्राष्ट्रिय समाचार संस्थाहरुले जनाएका छन् । पेन्टागनले बताएअनुसार युद्धका लागि तयार करिब आठ हजार पाँच सय अमेरिकी सेनालाई हाई अलर्टमा राखिएको छ ।
पेन्टागनका प्रेस सचिव जोन किर्बीले नेटोले ¥यापिड रियक्सन फोर्सलाई सक्रिय बनाउने निर्णय गरेमा वा अन्य कुनै नयाँ परिस्थिति सिर्जना भएमा हाई अलर्टमा राखिएका सैनिकहरुलाई तैनाथ गर्ने बताएको बीबीसीले जनाएको छ ।
रुसले युक्रेनमा आक्रमण नगर्ने दाबी गर्दै आए पनि सीमा क्षेत्रमा करिब एक लाख रुसी सैनिक अत्याधुनिक हतियारसहित तैनाथ गरिएको छ । त्यसैले युक्रेनमा कुनै पनि बेला रुसले आक्रमण गर्न सक्ने विश्लेषण गर्दै अमेरिकाले उच्च सतर्कता अपनाएको हो ।
रुस–युक्रेन तनाव बढेपछि अमेरिकी राष्ट्रपति जो बाइडनले सोमबार युरोपका सहयोगी देशहरुसँग भर्चुअल छलफल गरेका थिए । सो छलफलपछि पश्चिमी देशहरुले रुसविरुद्ध समान रणनीति अपनाउने निर्णय गरेको बताएकोे छ । भर्चुअल छलफलमा बेलायत, फ्रान्स, जर्मनी, इटली, पोल्याण्डका सरकार प्रमुखहरुका साथै नेटो प्रमुख जेन्स स्टोलटेनबर्ग सहभागी थिए ।
नेटोका सदस्य देशहरु डेनमार्क, स्पेन, फ्रान्स र नेदरल्याण्डले रक्षातन्त्र मजबुत बनाउन पूर्वी युरोपमा फाइटर जेट र युद्धपोत पठाउने तयारी गरेका छन् । युक्रेनको विषयलाई लिएर अमेरिका र नेटो सदस्य राष्ट्रहरुले रुसमाथि आक्रमण गर्न सक्ने बताइएको छ ।
