काठमाडौं – आज देशभर सामान्यदेखि पूर्णतया बदली रही प्रदेश एक, बागमती, गण्डकी, कर्णाली र सुदूरपश्चिम प्रदेशका थोरै स्थानमा हल्का वर्षा भइरहेको जल तथा मौसम विज्ञान विभागले जनाएको छ । आज केही प्रदेशमा भारी वर्षा हुने र चारवटा प्रदेशका केही स्थानमा भारी वर्षा हुने सम्भावना रहेको छ ।
विभागका अनुसार आज दिउँसो देशभर सामान्य बदली रही धेरै स्थानमा हल्कादेखि मध्यम वर्षाको सम्भावना रहेको छ । गण्डकी प्रदेश, कर्णाली प्रदेश र सुदूरपश्चिम प्रदेशका एकदुई स्थानमा भारी वर्षाको सम्भावना रहेको छ । काठमाडौंमा आज दिउँसो सामान्यदेखि मध्यम वर्षाको सम्भावना रहेको मौसमविद्को भनाइ छ । काठमाडौंमा आज दिनभर मौसम बदली रहने छ । त्यसैले सामान्यदेखि मध्यम वर्षाको सम्भाना रहेको छ । यद्यपि राति भने भारी वर्षाको सम्भावना रहेको छ ।
यस्तै आज राति देशभर सामान्य बदली रही केही स्थानमा हल्कादेखि मध्यम वर्षाको सम्भावना रहेको छ । बागमती प्रदेशका एकदुई स्थानमा भारी वर्षाको सम्भावना रहेको छ विभागको भनाइ छ । वर्षा हुने क्रम अब विस्तारै कम हुँदै जाने मौसमविद्को भनाइ छ । यद्यपि, सेप्टेम्बरको अन्तिम र अक्टोबरको पहिलो हप्ता नभइ मनसुन नसकिने भएकाले जुनसुकै बेला भारी वर्षा हुने सम्भावना छ । भारी वर्षाको सम्भावना रहेकाले पहाडी भू–भागमा भूक्षय, पहिरो तथा गेग्रान बहावको जोखिम रहेको छ । नदीनाला र खहरे खोलामा पानीको सतह बढ्न सक्ने भएकाले सामान्य सतर्कता अपनाउन विभागको आग्रह छ ।
