ललितपुर – ललितपुर महानगरपालिकाले ‘कोरोना सङ्क्रमित बिरामीहरुलाई प्रदान गरिने उपचार तथा राहत सहयोगसम्बन्धी निर्देशिका–२०७८’ का केही प्रावधानहरुमा द्विविधा उत्पन्न भएको भन्दै थप स्पष्ट पारेको छ । महानगरपालिकाले आज एक विज्ञप्ति निकाल्दै कोरोना भाइरसको सङ्क्रमणबाट मृत्यु भएका व्यक्तिका परिवारलाई प्रदान गरिने उपचार तथा राहत सहयोगबारे थप स्पष्ट पारेको हो ।
महानगरपालिकाले कोरोना सङ्क्रमण भई अस्पताल, आइसोलेसन सेन्टर वा अन्य ठाउँमा मृत्यु भएका वा सङ्क्रमणमुक्त भएका तर डिस्चार्ज नहुँदै उपचारका क्रममा मृत्यु भएका व्यक्तिको परिवारलाई राहत स्वरुप १ लाख २० हजार रुपैयाँ उपलब्ध गराउने भएको छ । कोरोना सङ्क्रमण भई अस्पताल वा स्वास्थ्य संस्थाको आईसीयू वा भेन्टिलेटरमा उपचार गराएका नगरवासीलाई उपचार खर्च तथा राहत वापत ६० हजार रुपैयाँ उपलब्ध गराउने निर्देशिकामा उल्लेख छ ।
यस्तै सङ्क्रमण पुष्टि भएर अस्पतालमा भर्ना भएर सामान्य उपचार गराई सङ्क्रमणमुक्त भएका व्यक्तिलाई पनि अस्पतालको बिलको आधारमा बढीमा ३० हजार रुपैयाँ राहत पाउने पनि निर्देशिकामा उल्लेख छ । उपचार तथा राहत सहयोग प्राप्त गर्नका लागि सङ्क्रमित व्यक्ति अस्पताल वा स्वास्थ्य संस्थामा भर्ना भई उपचार गरेको हुनुपर्ने छ । २०७७ साउन १ गते पश्चात् कोरोना सङ्क्रमित भएका महानगरपालिकाका स्थायी नागरिकले मात्रै यो सहयोग प्राप्त गर्नेछन् । उपचार तथा राहत सहयोग प्राप्त गर्नका लागि २०७८ असार ६ गतेभन्दा अगाडि सङ्क्रमित भएका व्यक्तिको हकमा ६० दिनभित्र पेश गर्नुपर्ने छ ।
सहयोग प्राप्त गर्नका लागि कोभिड पोजेटिभ भएको पीसीआर रिपोर्ट, संक्रमितको पहिचान खुल्ने कागजात, अस्पताल भर्ना–डिस्चार्ज भएको मिति उल्लेखित कागजात, मृतकको हकमा अस्पतालले उपलब्ध गराएको मृत्यु प्रमाणपत्र, सम्बन्धित वडा कार्यालयको मृत्यु दर्ता प्रमाणपत्र, मृतकसँगको नाता सम्बन्ध खुल्ने कागजात, होम आइसोलेसनमा वा अन्यत्र मृत्यु हुनेको हकमा वडा कार्यालयको सिफारिस तथा शव व्यवस्थापन पुष्टि हुने कागजात पेश गर्नुपर्ने निर्देशिकामा उल्लेख छ ।
महानगरपालिकाद्वारा जारी विज्ञप्ति :
