काठमाडौं – आज उपत्यकामा निषेधाज्ञाको आठौं दिन हो । आंशिक व्यापारिक गतिविधि खुलेकै कारण लगानी प्रवाह ठप्प हुन पाएको छैन, जसले गर्दा पैसा थुप्रिन पाएन । कर्जा माग बढ्नु भनेको आर्थिक गतिविधि बढ्नु पनि हो । पहिलो लहरको कोरोना सङ्क्रमणको बेला भएको लकडाउनमा आर्थिक गतिविधि ठप्प हुँदा बैकिङ सिस्टममा पैसा थुप्रिएर झण्डै २ खर्ब पुगेको थियो ।
तर दोस्रो लहरको कोरोना सङ्क्रमण बढ्दै जादा भएको निषेधाज्ञामा भने बैकिङ सिस्टममा पैसा थुप्रिन पाएको छैन । यद्यपि, विस्तारै तरलता भने बढ्दै गएको देखिन्छ । केही समय अघि १४ अर्ब तरलता रहेकोमा अहिले ३९ अर्ब रुपैयाँ पुगेको नेपाल राष्ट्र बैंकका प्रवक्ता देव कुमार ढकालले जनाएका छन् ।
