एजेन्सी – सिरियास्थित ईरानसमर्थित मिलिसियाहरुको अखडामा अमेरिकाले आक्रमण गरेको छ । अमेरिकी राष्ट्रपति जो बाइडेनको निर्देशनमा अमेरिकाले हवाई आक्रमण गरेको पेन्टागनका प्रवक्ता जोन किर्बिले जारी गरेको विज्ञप्तिमा उल्लेख गरिएको छ । यसअघि ईरानले अमेरिकी गठबन्धनका सैनिकहरुलाई लक्षित गरी ईराकमा गरेको आक्रमणको बदलास्वरुप यो हमला गरिएको समेत विज्ञप्तिमा उल्लेख गरिएको छ ।
पेन्टागनका अनुसार अमेरिकी फाइटर प्लेनहरुले ७ वटा निशाना साँधेका थिए । कता ईब हिजबुल्लाह र कता ईब सय्यिद अल सुहादा ईरान समर्थित मिलिसियाहरुले प्रयोग गर्दै आएका धेरै भौतिक पूर्वाधारहरुमा आक्रमणबाट क्षति भएको छ ।
यस आक्रमणमा मर्नेको सङ्ख्या भने यकिन भइसकेको छैन । यद्यपी, सिरियल अब्र्जभेटिभ फर ह्युमन राईट्स (एसओएचआर)ले दर्जनभन्दा बढी ईरान पक्षधर लडाकुहरुको मृत्यु भएको जानकारी दिएको छ । ‘प्रारम्भिक रुपमा कम्तिमा पनि १७ जना लडाकु मारिएजस्तो देखिन्छ । उनीहरु सबै पपुलर मोबिलाईजेशन फोर्सहरुमा सदस्य हुन्,’ एसओएचआरका निर्देशक अब्दुल रहमानले एएफपी न्युज एजेन्सीसँग बताएका छन् ।
ईराकको इर्बिलस्थित विमानस्थलको मुख्य सैनिक अखडामा झन्डै दुई साताअघि ईरानले आक्रमण गरेको थियो, यसक्रममा दुईजना विदेशी ठेकेदारहरुको मृत्यु भयो भने एक अमेरिकी सैनिकसहित कम्तिमा ९ जना घाइते भएका थिए ।