काठमाडौं – नेपाल स्टक एक्स्चेञ्जको अनलाइन कारोबार प्रणालीमा समस्या देखिएको छ । साताको तेस्रो कारोबार नेप्सेको वेवसाइट र टिएमएसको वेवसाइटमा कारोबार तथ्याङ्क नै फरक देखिएको छ । कारोबार प्रणालीमा समस्यादेखिए पछि ब्रोकर कम्पनीबाट ‘टिएमएस’ नामक सफ्टवेयर लिएर अनलाइन कारोबार गर्दै आएका लगानीकर्ताहरु अलमलमा परेका छन् । सेयर बजारका सक्रिय लगानीकर्ता प्रविण श्रेष्ठले टिएमएस र नेप्सेमा फरक तथ्याङ्क देखिदा कारोबार गर्नै डर लागेको जानकारी दिएका छन् । नेप्सेको वेवसाइटमा कारोबार रकम १ अर्ब ५४ करोड रुपैयाँ भन्दा धेरै पुगिसक्दा समेत टिएमएसमा भने ९० करोड ७६ लाख रुपैयाँमात्रै देखाएको छ । ‘यहाँ ठूला लगानीकर्ताहरुको चलखेल पनि हुनसक्छ । कारोबार टर्नओभर नै फरक देखिनुमा शङ्का गर्ने ठाउँ छ’ उनले भने, ‘यसले गर्दा मैले सेल डिशिजन नै लिन सकिरहेको छैन ।’ अनलाइन कारोबार प्रणालीमा यस अघि पनि समस्या आउने गरेको थियो । नेपाल धितोपत्र बोर्डका कार्यकारी निर्देशक निरज गिरीले समस्याका विषयमा बुझ्ने बताएका छन् । कुनै त्यस्तो समस्या आए तत्कालै समाधान गर्न बोर्डले नेप्सेलार्य निर्देशन दिने समेत उनले जानकारी दिएका छन् ।
