परराष्ट्रमन्त्री डा आरजु राणा देउवा र भारतका विदेश सचिव विक्र मिस्रीबीच भेटवार्ता
काठमाडौँ, साउन २८ गते । नेपालको दुई दिने भ्रमणमा रहनुभएका भारतका विदेश सचिव विक्र मिस्रीले नेपालका परराष्ट्रमन्त्री डा आरजु राणा देउवासँग शिष्टाचार भेट गर्नुभएको छ । आज सोमबार सिंहदरबारस्थित परराष्ट्र मन्त्रालयमा उहाँहरुबीच भेट भएको हो ।
परराष्ट्र मन्त्री देउवा र भारतीय विदेश सचिव मिस्रीबीच द्विपक्षीय सम्बन्धका विविध पक्षका साथै आर्थिक एवं विकास सहायता तथा आयोजनालगायतका विविध विषयमा छलफल भएको मन्त्रालयले जनाएको छ ।
भेटका अवसरमा मन्त्री डा देउवाले नेपाल भारत ‘एयर कनेक्टिभिटी’ बढाउन नेपाललाई थप हवाई रुटको उपलब्धताका लागि सचिव मिस्रीमार्फत् भारतसँग कुरा उठाउनुभएको थियो ।
परराष्ट्र मन्त्री डा देउवाले नेपाल र भारतका सीमा क्षेत्रहुँदै आयात हुने तरकारी तथा फलफूलको गुणस्तर मापनसम्बन्धी परीक्षणका लागि प्रयोगशाला स्थापना गर्न भारतको पहलका लागि पनि कुरा उठाउनुभएको थियो ।
सो भेटवार्ताका क्रममा पञ्चेश्वर आयोजनाका बाँकी काम अघि बढाउने बारेमा मन्त्री डा देउवाले उठाउनुभएको विषयमा यसका धेरैजसो समस्या समाधान भइसकेका र बाँकी प्राविधिक समूहमार्फत अघि बढेर सम्बोधन गरिने विषयमा छलफल भएको थियो ।
त्यसैगरी मन्त्री डा देउवाले टनकपुर बाँधको नहरमा पानी छोड्न, बाडगङ्गा, खाँडो र राप्ती नदीको बाढी नियन्त्रण तथा जोखिम कम गर्ने सम्बन्धमा आवश्यक सहायता उपलब्ध गराउने विषयमा सचिव मिस्रीमार्फत् भारत सरकारसँग कुरा उठाउँदै दार्चुलामा महाकाली नदीमा निर्माण गरिएको पक्की पुल उद्घाटनको प्रसङ्ग पनि उठाउनुभएको थियो ।
मन्त्री डा देउवाले व्यापार तथा पारवहनसम्बन्धी वार्तालाई निरन्तरता दिनुपर्ने विषयमा पनि कुराकानी गर्नुभएको थियो । उहाँले जाजरकोट भूकम्पमा परेका पीडितको उद्धार र सहायताका लागि भारत सरकारको सहयोगप्रति धन्यवाद ज्ञापन गर्नुभएको थियो ।
